2030 Nuummi inuit 30.000inngornerisa kingunerissavaa, illoqarfimmi meeqqat amerlanerulissasut. Taamaattumik pisariaqartitsineq matussuserniarlugu atuarfiit, AKO’t aamma ukioqatigiinngiiaanut meeqqeriviit nutaat sanaartorneqassapput.
Kommuneqarfik Sermersuup Nuummi meeqqeriveqarnermik misissuinerani paasinarsivoq, meeqqat ukioqanngitsuminngaaniit arfinilinnut ukiullit 2030mi 800t pallissagaat. Tamatuma kingunerisaanik meeraaqqerivinni meeqqerivinnilu inissat amerlanerusut pisariaqartinneqassapput. Tamanna pillugu meeqqerivimmiititsinissamik pisariaqartitsinerunissaq matussuserniarlugu ukioqatigiinngiaanut meeqqeriviit nutaat arlallit sanaartorneqassapput.
”Nuummi meeraaqqerivinnut meeqqerivinnullu utaqqisuutigut amerlasoorujussuanngoreerput, meeqqeriviutigullu annertuumik inissakillioreerlutik. Taamaattumik pingaaruteqarluinnarpoq, illoqarfimmi meeqqat ukioqanngitsuninngaanniit arfinilinnut ukiulinnut amerligaluttuinnartunut inissaqartitsineq pillugu nutaanik ukioqatigiinngiiaanut meeqqeriviliortitsernissaq” taama oqarpoq Helene Broberg Bertelsen, Kommuneqarfik Sermersuumi Meeqqanut, Ilaqutariinnut Atuarfeqarnermullu Ingerlatsivimmi pisortaasoq.
Illoqarfiit pingaarnersaat pillugu periusissiaq aamma Nuup ineriartortinneqarnissaani meeqqat anginerit paarineqarnissaannut tunngasutigut pitsanngorsaanissaq ilaavoq. AKO’t nutaat (meeqqanut 1. klassimiit 3. klassertunut atuareernerup kingorna ornittakkat) katillugit pingasut Nuummi sananeqassapput. AKO’t tamarmik immikkut meeqqanik 200t pallillugit inissaqartitsissapput. Taakkulu Nuup qeqqani, Qinngutsinni aamma Siorarsiorfimmi atuarfiliornermut atatillugu sananeqassapput.
Atuarfiit nutaat
Aammattaaq Nuummi illoqarfimmik inerisaanermi illoqarfimmi atuarfiit pitsanngorsarneqarnissaanni nutarterineq nutaaliaasunillu atortulersuineq ilaapput. Tamanna ilaatigut nutaarluinnarnik marlunnit immikkut tamarmik 1200nik atuartoqarsinnaasunik sananikkut – illoqarfiup qeqqani aamma Siorarsiorfimmi – kiisalu Atuarfik Hans Lyngemi atuartut 400nik amerlisinnaanngorlugit allilerneratigut. Illoqarfiup qeqqani atuarfik piffissap ingerlanerani USKimut ASKimullu taarsiutaassaaq.
”Kommunip atuarfiutai marluusut illoqarfiup qeqqaniittut aserfallassimaqalutillu atorneqarsinnaaneri sivisujunnaarluinnarput. Atuartuutitsinnut inissanik amigaateqarpugut, pisariaqartitsinerlu annertusigaluttuinnartussaalluni. Taamaattumik nuannaarutigilluinnarpara paasillugu illoqarfimmik inerisaanermi atuarfeqarnermut tunngasutigut suliniuteqartoqartoq. Atuartut eqeersimaarnerulernissaat ilikkagaqarsinnaanerallu pillugu nutaanik nutaaliaalluinnartunillu atuarfeqarlutik atuartinneqarnissaat pisariaqarluinnarpoq” Helene Broberg Berthelsen oqarpoq.
Maannangaaq Atuarfik Hans Lyngemi inissaaleqineq atuuppoq. Taamaammat atuarfiup allilerneqarnissaa pisariaqarpoq. Angajullernut naleqqussakkamik atuartitsiviusinnaasunik 8.-10. klassimi atuartunut ingerlariaqqiffittut atuarfeqalernissaq sulissutigineqarpoq.