Nunatsinni pilersaarutaasimasuni inuiaqatigiinnut tunngatillugu sanaartortitsisunut piumasaqaatit uani pilersaarutaasumut pilersumut aatsaat taama qaffasissitigipput.
Pilersaarut una Nunatsinni pilersaarutaasimasuni aatsaat taama annertutigimmat Kommuneqarfik Sermersuup CSRikkut (Corporate Social Responsibility)-pisussaaffiit arlallit pilersaarummut ilanngunniarpai. Ilaatigut tamatuma kingunerissavaa, pilersaarutikkut pisussaaffiliissammat 100 ilinniartuuteqarnissaq najukkameersunillu sulisoqarnissaq.
”Najukkamiit tunngaveqarnissaa pilersaarummut illoqarfimmullu aalajangiisooqataassaaq. Kommunalbestyrelsimit pingaartinneqarpoq, illoqarfimmi siunissami ilinniarfissanik aamma suliffissanik ataavartunik pilersitsinissaq siunertaralugu piumasaqaateqarnissaq,” borgmester Asii Chemnitz Narup (IA) oqarpoq.
Nuummi ilinniarfissat 100 qilanaarineqarsinnaapput. Borgmesterip tulliata aappaata Ane Egede Mathæussenip (S) tamanna nuannaarutigaa:
”Inuusuttunut ullumikkut ilinniagaqalersimanngitsunut anguniagalimmik suliniutissatut periarfissatsialaavoq. Tassani takutinneqarpoq, soorlu erngup kuseriarnera siaruaattartoq taamatulli pilersaarut Nuummut assigiinngitsorpassuartigut iluaqutaajumaartoq.”
Inissialiassanut meeqqeriviliassanullu atortussat amerlanersaat illoqarfimmi sanaartorneqassapput – ilaatigut tassani pineqarlutik martut, igalaat betonillu.
”Tamanna aatsaat pisinnaavoq, pilersaarutip taama annertutigisup aallartinneqarneraniilli kalaallit tunisassiaannik nunaqavissunillu sulisoqarnissaannik pisussaaffittalerneqarmat. Taamaalilluta Nuummi Nunatsinnilu inuiaqatigiinni malunnaateqartussat pilersaarummi CSR-ikkut pisussaaffiliinerit arlallit ilanngussinnaasimavagut” oqarpoq bormesterip tullia siulleq Justus Hansen (D).