• Skip to primary navigation
  • Skip to main content
Siorarsiorfik

Siorarsiorfik

Nuuk City Development

  • Suliniutit
    • Qatserisarfik
    • Sanaartorfigiuminarsaanermut suliat
    • Meeqqerivik nutaaq
    • Sullorsuup allineqarnera
    • Sanaartorfigiuminarsaanermut suliat
  • Suliniutit naammassereersut
    • Sissaq sinerlugu aqqusiaq
    • Inussiviup eqqaani aamma Qapiarfiusaami ukioqatigiinngitsunut meeqqeriviit immikkoortukkaartut.
    • Sanaartorfigiuminarsaanermut suliat naammasereersut
    • Nuuk Centerimut ilassutissaq
  • Pillugu
    • Siorarsiorfik pillugu
    • Code of Conduct
    • Siulersuisut
    • Sulisut
    • Ukiumoortumik nalunaarutit
  • Nutaarsiassat
  • Webkamerit
  • Kalaallisut
    • Kalaallisut
    • Dansk
  • Show Search
Hide Search

Nuup ineriartornera ataatsimoorussassatut akisussaaffigalugu

Oqaaseq ineriartorneq eqqarsaatigigaangakku, taava eqqarsaatigisarpakka aningaasatigut ineriartorneq, suliffissanik pilersitsiortorneq, inissianik nutaanik sanaartorneq aammalu assersuutigalugu atuarfeqarfimmik isumaginninnermullu tunngasunik pitsanngorsaanerit. Tamakkua tamarmik tassaapput amerlanerusugut pisariaqartitat tamaasa naammassissagutsigit alloriaqqittariaqarluta ilisimagipput.

Nuummi inissialiornissaq pisariaqartipparput, tassami ukiut tamarluinnaasa misigisaratsigu illoqarfiit pingaarnersaannut nuuttartut amerliartortut, taamaattumillu inissanik pitsaasunik neqerooruteqarsinnaasariaqassalluta, pitsaasunik meeqqeriveqartitsissalluta pitsaasunillu atuarfeqartitsissalluta, taamaalilluta ima pitsaatigisumik ineriartorneq attanniassagatsigu, allaat inuppassuit, siornatigut Nunarput qimallugu allamut nuukkumallertarsimagaluartut Nuummut nuukkumalersissallugit.

Ilaatigut tamakku pissutigalugit Siorarsiorfik pillugu pilersaarut nuannaarutigeqaara, tassuunakkummi taamatoqqissaaq ineriartortitsinissaq pilersinneqassammat, Nuuk kisimi pinnani, nunali tamakkerlugu pisariaqartinneqarmat – piareersimaffigineqarlunilu.

Siorarsiorfik aningaasaqarnikkut qaffassaaqataassaaq, nuna tamakkerlugu iluaqutaasussamik, inuiaqatigiinnilu malunniutissaaq ilinniartoqarfissanik amerlisaanikkut, suliffissanik amerlisaanikkut aammalu najukkami nutaanik tunisassiorfeqalernikkut.

Ataasimut isigalugu pilersaarut Kalaallit Nunaanni aningaasaqarnikkut ineriartortitsiffiussaaq ukiuni aggersuni 40-ni, tamattalu kingulissavullu periarfissamik matuminnga ammasumik ilassinninnissarput pisariaqartipparput. Tassa najukkami siuariartornissarput pisariaqartipparput.

Meeqqerivinnik amigaateqarpugut, ullutsinnut naleqquttunik atuarfinnik amigaateqarpugut, inissianik amigaateqarpugut, aammalu inuussutissarsiutini ungasinnerusoq eqqarsaatigalugu annertuumik siunissamullu patajaatsumik ingerlanneqartussanik amigaateqarpugut. Tamakkua Siorarsiorfik aqqutigalugu pilersissinnaavagut – kisianni ataatsimoorussiffigisariaqarpavut; ataatsimoorluta pilersittariaqakkavut.

Taamaattumik aamma nuannaarutigaara, tusarniaaneq sapaatip-akunnerinik marlunnik sivitsorneqarmat, taamaalilluta pilersaarut tamakkerlugu sapaatip-akunnerini arfineq-pingasuni tusarniaassutigisinnaanngorlugu, sapaatip-akunnerinut arfinilinnut taarsiullugu. Uatsinnut pilersaarummut qanimut malinnaasunut pingaaruteqarluinnarpoq, kikkulluunniit tusarneqarnissaminnik kajumittut tusarneqarnissaat. Tassaagamimi Kalaalit Nunaata oqaluttuassartaani pilersaarutit annertunersaralugulu pingaaruteqarnissaat. Taamaattumik sapinngisamik amerlasuut tusarniarneqassapput – aammalu taamaattumik maani Nuummiittut tamakkerlugit peqataatikkusuppavut.

Ataatsimoorluta siunissaraarput illoqarfiillu pingaarnersaata ineriartornissaa matumani pineqarpoq. Pilersaarusiornerup sapinngisamik pitsaasuunissaa anguniarlugu isummasi tusarusuppavut. Eqqaamassavarput una aamma inunnut inuunermilu pitsaassutsimut tunngassuteqarmat. Illoqarfiit pingaarnersaata pitsaasumik ineriartortiinnarnissaanut ataatsimut iluarisimaarnerput aalajangeeqataalluinnarmat, Nuummi innuttaasut ajunngitsumik iluarisimaarnermillu misiginissaannut inissaqartitsinissarput matumani pineqarpoq. Nuuk najugarissallugu nuannersuunissaa qulakkeerniartuaannartussaavarput; najugarerusutaq.

Asii Chemntiz Narup, bormesteri

Footer

Siorarsiorfik – Nuuk City Development A/S

Imaneq 32, 1. th.
Postboks 989
3900 Nuuk
Kalaallit Nunaat

Email ncd@ncd.gl
Telefon +299 38 30 60

Facebook

Copyright Siorarsiorfik © 2023.

  • Suliniutit
  • Suliniutit naammassereersut
  • Siorarsiorfik pillugu
  • Nutaarsiassat