Nuup illoqarfiata qeqqa alliartorpoq, qiterisaqarfinnilli pingaaruteqartunik pilersitsiffiusarpoq, taamaasilluni illoqarfiit pingaarnersaat siunissami issittumi illoqarfiit pingaarnersaattut pilersaarusiorfigineqarniassammat.
Nuup tillernera illoqarfiup qeqqani suli sakkortunerulissaaq, tamaani illoqarfiup qeqqa illoqarfiullu qiterisaqarfia inerisarneqassalluni nutaamik atuarfiliorfigalugu meeqqeriveqarfiliorfigalugulu.
Nuup siunissaa qanoq ittuussanersoq pillugu pilersaarusiornissaq pingaaruteqarluinnartuuvoq, piujuartitsillunillu ineriartortitsisoqarniassammat aammalu Nuuk najugaqarfissatut suli pilerinarneruniassammat.
Piviusut tunngavigalugit Nuuk innuttaasunit 200-300-nit ukiumut nuuffigineqartarpoq, naatsorsuutigaarpullu kisitsisit taakku amerliartussasut, suliffissat nutaat, meeqqerivinni inissat inissiallu pitsaanerusut pigileriartorneri ilutigalugit.
Ineriartorneq illoqarfimmi siammarterpoq
Illoqarfimmi qitiusoqarfittaassat tassaassapput atuarfiit, meeqqeriviit, kulturimut tunngassutillit inuussutissarsiuteqarfiillu. Siorarsiorfimmi qitiusoqarfik nutaarluinnaq pilersinneqassaaq, maannakkullu Nuummi qitiusoqarfiit pioreersut, Nuussuaq aamma Qinngorput sulisoqarfinnik nutaanik pilersitsiffiullutik annertusaaffigineqassapput.
Pilersaarutaavoq Nuummi ineriartornerup sumiiffinnut nutaanut siammarterneqarnissaa, taamaasilluni illoqarfimmi innuttaasunut qanittuniittut qorsuttaqaannarniassammata peqatigitillugulu sanaartukkat pilersaarutillu illoqarfiup nutaartaani nutaani uummarissaataassallutik.
Ilusilersuineq pinngortitaq ataqqillugu naleqqussagaq
Qinngutsinni Siorarsiorfimmilu illoqarfiup nutaartaanut takorluukkat tassaapput illoqarfiup ilaannik nutarterinissaq, nuna ersarissarlugu pinngortitamullu qaninnerulersitsilluni. Illoqarfiup ilai tamakku nunap illoqarfiullu imminnut ilassuuttutut isikkoqartinneqassapput, sammisassanut inissaqarlutik, uninngaarfissaqarluni aammalu inuunermi pitsaassusissaq qaffasinnerpaassalluni.
Atuarfiit, sulisoqarfiit inissiallu sanaartorneqassapput, kommunip illuliortaatsimut politikkianut naapertuuttunngorlugit, tamatumani anguniarneqarmat pitsaasunik atorluarsinnaasunillu, pitsaassutsimik pisuunnguallatsitsisussanik sanaartortoqarnissaa. Toqqissisimanartunik avatangiiseqarnissaq qitiutinneqassaaq, aammalu inuit naapittarfissaannik pilersitserusuppugut.
Pilersaarummi inuussutissarsiuteqarneq nukittorsarneqassaaq
Inuussutissarsiuteqartut kommunimut pilersaarummi aamma eqqarsaatigineqarput, ilaatigut Qeqertani Pukuffiullu avannaata tungaani inuussutissarsiuteqarfinnik nutaanik pilersitsiortornissaq pilersaarutigineqarluni. Nuuk tassaavoq Nunatsinni inuussutissarsiuteqarfiunerpaaq, aammalu suliffeqarfinnut pilerinartunik periarfissiisoqarnissaanik pisariaqartitsiffiusoq.
Pilersaarut nutaaq atorlugu kommunalbestyrelsip anguniarpaa inuussutissarsiuteqartunut pitsaasunik atugassaqartitsisoqalernissaa, kisiannili aamma sulisorineqartut piumasaqaataannik pitsaasunik atugassaqartitsisoqarnissaa, Nuullu najugariuminartunngorsarneqarnissaanut ilapittuutaasussanik pilersitsisoqarnissaa. Tamanna atuuppoq inissianut, atuarfinnut aammalu kulturimut tunngasunut ulluuneranilu neqeroorutinut.
Pilersaarut annertooq
Pilersaarut nutaaq tamakkiisoq kommunip kommunimut pilersaarutaanut annertuumut nutaamut pingaarnersiorlugu saqqummiunneqassaaq. Pilersaarummi tassani siunissami Nuuk eqqartorneqarpoq, Nuummilu aningaasaliinissap pilerinartunngortinneqarnissaa allaaserineqarluni.
Tassaavoq Kommuneqarfik Sermersuup illoqarfiit pingaarnersaannut periusissiaanut pingaaruteqarluinnartoq, sanaartugassat pilersaarusiorneqartassasut pitsaasumillu aserorsaataanngitsumik agguataarneqartassasut. Taamaattumik Nuummi siunissaq pillugu sulinermi kommunip ilusilersuinermut najoqqutaa aallaaviusorujussuuvoq, taannalu ilaatigut Naalagaaffiit Peqatigiit piujuartitsilluni ineriartortitsineq pillugu malittarisassaanik aallaaveqarluni
Piviusut – suliniutit nutaat
- Kommunimut pilersaarut nutaaq Siorarsiorfimmi Qinngutsinnilu illoqarfiup nutaartaani pilersaarutinik imaqarpoq.
- Nuummiit Qinngorput aqqusaarlugu Siorarsiorfiup tungaanut aqqut appakaaffissaq tassaassaaq sissaq sinerlugu aqqusineq.
- Sissaq sinerlugu Qinngutta Siorarsiorfiullu akornanni aqqut takussaalluni atassusiisoq.
- Atuarfiit nutaat: Atuarfik Samuel Kleinschmidt (ASK) & Ukaliusaq (USK) taartissaat atuarfik nutaaq Atuarfik Hans Lyngemik alliliineq kiisalu Siorarsiorfimmi atuarfik nutaaq.
- Ukioqatigiinngitsunut meeqqeriviit meeraaqqerivittallit nutaat – meeqqeriviit meeraaqqeriviillu.
- AKO (SFO) – Atuareernerup kingorna ornittakkat – Meeqqanut inuussuttunullu sunngiffimmi sammisassaqartitsiviit
- Qiterisaqarfik kulturimut tunngasunut niuernermullu atuumassutilinnut (ilaatigut arsaattarfissuaq nunaminertallu inuussutissarsiuteqarfissat)
- Inissiaqarfiit nutaat
- -tamakkua tamarmik Nuuk pingaarnertut ilusaanut ilaatinneqarput, kommunimullu pilersaarummut tapiliussat 37-it
- Nye boligområder.
- – Alt inkluderet i en ny hovedstruktur for Nuuk og 37 kommuneplantillæg.