Naatsorsuutitigut paasisassaanngitsuliornerit illoqarfimmik ineriartortortitsiffik amigartoortippaat.
Siorarsiorfiup – Nuuk City Developments-ip siorna naatsorsuutai 241 millioner koruuninik amigartooruteqarfiupput. Amigartoorutilli atuivallaarnermik imaluunniit isertitaqanngitsoornermik peqquteqanngillat. Illuutilli ingerlatseqatigiiffiup pigisaasa nutaamik naliliiffigineqarnerat peqqutaapput. Illut taakku NCD-mut tunniunneqarnerminni naliliiffigineqaramik 687 millioner koruuninik nalilerneqasimapput. Kisiannili Illut misissoqqissaarneqarnerini inissiat attartortittakkat iluarsaanneqartariaqartut paasineqarpoq. Tamatuma kingunerisaanik nalingi 467 millioner koruuninut appartinneqarput.
Nalinginik aalajangiinerup appasinneruneranut illut aallaqqaammut pitsaanerusutut nalilerneqarsimanerat peqqutaavoq.
Tassalu naatsorsuutit eqqarsaatigalugit NCD-p ukioq naatsorsuusiorfiusoq atuuffinilu naggaseramigit amigartooruteqarpoq.
”Amigartoorutit 200 millioner koruuninik annertussusillit annertoorujussuartut isikkoqarput, kisiannili qujanartumik tamanna nalinik appaanerinnarmik peqquteqarpoq. Naliliineq nutaaq kommunimut ingerlatseqatigiiffimmulluunniit aningaasartuuteqartitsissanngilaq, kisiannili inissiat siunissami aserfallatsaalineqarnissaannik aallussinissamik annertusititsissaaq”, NCD-p siulersuisuini siulittaasoq Ole Jakobsen oqarpoq.
Appaanerit eqqaassanngikkaanni, NDC-p naatsorsuutai missingersuusiornermi naatsorsuutigineqartutut isikkoqarput.