ABC Pavilloner tassaapput Nuummi ukioqatigiinngitsunut meeqqerivinnik marlunnik sanasussatut toqqarneqarsimasut. Siulleq Nuup Arsaattarfiata eqqaani inissisimassaaq aappaalu Qapiarfiusaami, ullumikkut pinnguartarfeqareersumi. Taamaasilluni tamaani ullumikkornit suli pinnguarnerusoqalissaaq, tamannalu nuannaarutigineqarpoq.

”Utaqqisut allattorsimaffiani allatsissimasut ikilinissaat uatsinnut pingaarutilerujussuuvoq, taamaattumillu nuannaarutigeqaara, maanna ataasiinnaanngitsumik - marlunnilli - nutaarluinnarnik meeqqerivittaartussanngoratta, taakkunanilu illoqarfimmi meerartavut paarineqarsinnaanngussallutik," borgmester Charlotte Ludvigsen oqarpoq, taamaasillunilu ukiortaami oqalugiaammini qitiutillugu oqariartuutigisani aalajangiusimallugu.

Illu pineqartut marluk 31,5 millioner koruuninik akeqassapput, kisianni illup aappaanut millioninik ataatsimik akikillisaasoqarsimavoq, pissutigalugu meeqqeriviit marluk ataatsikkut isumaqatigiissusiorfigalugit atsiortoqarsimammat.

”Modulit Danmarkimi sananeqassapput Nuummullu umiarsuakkut nassiunneqassallutik, tassanilu katiterneqassallutik. Tamanna pissutigalugu ukiamut atorsinnaaleriissavagut”, Jens Blidorf Frederiksen, Nuuk City Developmentimi pisortaaneq oqarpoq. Taassuma ilanngullugu nassuiaatigaa, toqqavissaanik kuitsisussamik Nuummeersumik pissarsisimallutik.

Suliap ingerlanneqarnerata nalaani malinnaatitsisoqarsimavoq, taakkualu atuisunut najoqqutassamik suliaqarsimapput. Suleqatigiit tassaasimapput perorsaasunut aqutsisut meeqqerivinni pioreersuneersut aammalu Meeqqanut Ilaqutariinnullu Ingerlatsivimmi sulisut.