Nuummi illoqarfiup ineriartortinneqarnissaanut nutarterneqarnissaanullu atatillugu, Kommuneqarfik Sermersuup  Siorarsiorfik – Nuuk City Development (NCD) pilersippaa. Kommunip inissiaataasa ilaat NCD-mut aqutassanngortinneqarnikuupput, taassumalu attartortut amerlanerit maannakkut attartukkaminnik piginnittunngorsinnaanerannik periarfissikkusuppai.

Naak maannakkut piginnittoq taaguuteqaleraluartoq Siorarsiorfik – Nuuk City Development, illut inissiallu suli Iserit-imit aqunneqarput.

Siullermik Unaaq-mi najugalinnut 72-inut allagarsititsisoqarpoq paasiniarlugu, attartortut qassit, attartukkaminnik pisinissaminnik soqutiginninnersut. Piffissaliussap qaangiunnerani attartortunit 72-init 25-it akissuteqarsimapput, taakkunanngalu 22-it periarfissinneqarnertik ilassilluarlugu akisimapput, annertunerusumillu paasissutissinneqarnissartik kissaatigalugu.

NCD-p najugaqartut tamaasa ukiumi nutaami paassissutissiinertalimmik ataatsimiigiaqquai. Inissiami ataatsimi attartortumiit piginnittunngornissaminnik amerlanerussuteqarpata, taava piginnittunngortitsinissamut suliassap aallartinnissaa NCD-p neriuutigaa.

Arlaatigut apeqqutinik akineqanngitsunik peqaruit/peqarussi uunga saaffiginninnissassinnut tikilluaqquneqarpusi:

  • Susie Kristiansen – e-mail: bolig@ncd.gl imaluunniit uunga sianerlutit paasiniaasinnaavutit 58 44 90 nal 10-14 akornanni.

Ilisimatitsissutitut oqaatigineqarsinnaavoq akissuteqartut 25-t akornanni koorimik assigiinngitsunik imalimmik NCD-mit makitsisoqarmat, makitaasorlu tassaavoq Åge Hansen, Unaaq 9-mi attartortoq. NCD-p pinnattoq pilluaqquaa.