Sissaq sinerlugu aqqutikkut pisuttuarneq taavalu Qinngutta Siorarsiorfiullu akornanni ualikkut seqinnernera aliannaarsaarfigalugu. Majuartaammut ingillutit Ukusissap tungaannut ingerlaarit – imaluunniit Kangerluarsunnguup tungaanut pinngortitarsuaq isikkivigalugu aliannaarsaarit. Periarfissat tamakkuupput kommunimut pilersaarummi nutaami ammaassiffigineqartussat.

Kommunalbestyrelsimut pingaaruteqarpoq qulakkiissallugu, Nuup ineriartornissaa inissianut inuussutissarsiuteqarfinnuinnarlu tunngasuunnginnissaa. Aamma illoqarfiup najugaqarfigiuminarnerulernissaanut ornigarluarneqartartussanut inissaqartitsisoqarnissaa pingaaruteqarluinnarpoq.

– Taamaattumik pilersaarummi illoqarfiup immikkoortuinut assigiinngitsunut sissaq sinerlugu aqqut atuarlugu ataqatigiissilernissaat qilanaaraarput. Sumiiffiit uummaarissuussapput, illoqarfimmi sumiiffinnik nuannernerpaat ilaannik tikikkuminarsaasussat, Sanarfinermut Avatangiisinullu Ataatsimiititami siulittaasoq, Malene Lynge oqarpoq.

Illoqarfiup immikkoortortaa nutaaq pinngortitamut qanittumiittoq

Illoqarfiup najugariuminarsarneqarnissaanut minnerunngitsumillu tikeraaruminarsarneqarnissaanut aaqqiissutissanik nassaarniarluni pimoorussisoqarpoq. Matumani sissaq sinerlugu aqqut periarfissaavoq. Alla tassaavoq qaqqamut majuartaat kommunimut pilersaarummi Siorarsiorfimmi inissaqartitsiffiusoq.

Matumani eqqarsaatigineqarpoq, innuttaasut takornariallu Ukkusissap qaavani sukisaarsartarfinnut ajornannginnerusumik orniguttalernissaat. Taava tamaani aqqutissanik nutaanik pilersitsisoqassaaq, qaqqallu qaava innuttaasunit suli pigineqarnerulissalluni.

Ataatsimut isigalugu Siorarsiorfik pinngortitaliarnissamut nutaanik periarfissiissaaq. Illoqarfiup nutaartaa Kangerluarsunnguamut ammaassissaaq, tamaani aalisarneq, sisorarneq, pisuttuarneq pinngortitamilu sammisassat allat nutaamik periarfissaalissapput.

Timmisartunut mittarfik nutaaq pisussaaffiliissaaq

Ornigarneqarsinnaasunik amerlanerusunik pilersitsinissamut minnerunngitsumik pingaarnertut peqqutaaqataavoq mittarfiup siunissami tallineqarnissaa. Tallineqarpat takornariat amerlissapput, kisiannili kilometerit ataatsimik ilaneqarpata tamanna kisimi anguneqarnavianngilaq. Taamaattumik kommunimut pilersaarut nutaaq atorlugu kommunalbestyrelse ornigarneqartartussanik nutaanik pilersitsiniarpoq, taavalu akunnittarfinnut takornarissanullu periarfissanut nutaanut inissaqartitsilluni.

-Mittarfiup Nuummut takornarissanut nutaanik periarfissiinissaa qularutissaanngilaq, taamaattumillu aamma erseqqilluinnarpoq, ineriartornermi siuttuussasugut atugassarititaasunillu pilersitsilluta avatitsinnit ornigarluarneqarnerulernissarput anguniarlugu, Sanarfinermut Avatangiisinullu Ataatsimiititami siulittaasoq Malene Lynge oqarpoq.

Pinngortitap qeqqani illoqarfik kultureqarfiusoq

Kisianni illoqarfiup ineriartortinneqarnissaa takornarianut tunngasuinnaanngilaq, innuttaasullu Nuummut nussorneri ilutigalugu illoqarfiup najugariuminartunngorsarnissaa eqeersimaarfiunissaalu pingaaruteqarpoq. Taamaattumik ataatsimut isigalugu sukisaarsartarfinnik pilersitsisoqarnissaa pingaaruteqarpoq, innuttaasut pilerigisaannik aalanissaminnullu periarfissaqarfigisaannik.

Peqatigitillugu illoqarfiit pingaarnersaannut periusissap ilagivaa pingaaruteqartoq, tassami innuttaasunut amerlanerusunut pilerinarsarneqassammat Nunatsinniillu nuuttartunik ikilisaaqataaffiussalluni. Tamanna iluatsissappat nutaamik illoqarfiliornissaq pingaaruteqarluinnarpoq, inissianik aqutsineq, meeqqerivinni inissaqartitsinissaq aammalu suliffissanik periarfissaqarnissaq periarfissaassalluni, aammali sulinngiffiup nalaani susassaqartuarnissaq pisariaqarluni. Illoqarfik eqeersimaarnissamut inuttullu attaveqarnissamut periarfissaqarfiusoq, Nuuk issittumi illoqarfiit pingaarnersaattut malugineqarluni, illoqarfik kulturileriffiusoq pinngortitamut ilassuuttoq.

– Nuuk najugaqarfigiuminartuussaaq. Nuummut nuuttartut amerliartuinnarput, kommunimut tamanna piumasaqaatinik malitseqarpoq taamaammallu pinngortitaq avatangiisitsinniittoq illoqarfillu qanillisassavagut, taama oqarpoq Malene Lynge.