Illoqarfiit allat assigalugit Nuummi uummaarissoqarfiusoq ineriartorfiullunilu allanngoriartorpoq. Illoqarfik kissaatigisatsitut ilusinissinnaaqqullugu eqqarsaatigilluakkamik pilersaarusiortoqareerneratigut tamanna pivoq. Ukioq maannamullu pilersaarut annertunerungaatsiarpoq.

Qanoq portutigisunik sanaartortoqassava, toqqaviit siunertanut sunut aaqqissuunneqassappat, immikkoortummi silamiiffissat, aqqusineeqqaat illuliortaaserlu. Apeqqutit tamakku kommunimut pilersaarummi nutaami akissutissarsineqarsinnaapput.

Pingaarnertut pilersaarut annertoorujussuanngornikuuvoq, ukioq mannalu kommunimut pilersaarummut tapiliussanik 37-nik imaqartoq, taakku immikkut tamarmik sumiiffiit assigiinngitsut siunissami pilersinneqartussat pillugit eqqartuiffiupput. Siorarsiorfimmi illoqarfiup immikkoortortaliornissaq annertuumik pilersaaruteqarnermi pissutaavoq, soorlu aamma Qinngutsinni Nuussuarmilu immikkoortunik nutaanik pilersitsisoqartussaasoq.

Piumasaqaatit sukumiisut kusanartuliornermut pitsaassutsimullu qulakkeerissutaassapput

Pilersaarummi assersuutigalugu sukumiisumik nassuiarneqarpoq, kommunimi politikki tassa meeqqerivigisamiit nuuttaqattaarnissaq pinngitsoortinniarlugu Atuarfik Samuel Kleinschemidtip eqqaani immikkuualuttumi nutaamik ukioqatigiinngitsunut meeqqeriviliornissamut qanoq inissaqartitsisoqarsinnaanersoq. Aammattaaq erseqqissaatigineqarpoq, meeqqeriviup taassuma silataani angissusaa illup iluani angissusaata assigingajassavaa.

Pilersaarummi aamma periarfissaatinneqarpoq, atuarfimmik isaterinissaq soorlu aamma arsaattarfik mikinerumaamillu pinnguartarfeqarnissaa periarfissaatinneqartoq.

Sumiiffimmi tassani aamma inissialiornissaq inissaqartinneqassaaq, pingaarnertut isikkuanik qulakkeerinnissutaasussamik meeqqeriviliornermili inissialiornermilu ataatsimut isigalugu ilusiliineq pitsaassuserlu pillugit arlalinnik piumasaqaatitaqarpoq.

Assersuutigalugu nutaamik sanaartorneq nunap ilusaa naapertorlugu pisassaaq. Sumiiffimmi kulturimut naapertuuttumik illuliortaaseqartoqassaaq. Atortut suut atorneqassanersut aamma allaaserineqarpoq. Assersuutigalugu qalia taartumik pappialarsuaqassasoq, zinkiussasoq, kanngussaassasoq, qisuussasoq imaluunniit qorsooqqissuutinneqassasoq.

Kulturi sissakkullu aqqusineeraq uummaarissuutitsissapput

Pilersaarummi aamma allaaserineqarpoq, kujataatungaani Nuussuarmi Maliup eqqaani Qinngutsinnilu illoqarfiullu immikkoortuani nutaami Siorarsiorfimmi nutaanik sanaartortoqassasoq.

Kommunimut pilersaarummut tapiliussami periarfissaatinneqarpoq, Nuussuarmi kulturimut niuernermullu tunngasunik pilersitsinissaq, soorlu arsaattarfik nutaaq, ataatsimeersuartarfik, hoteli, katersugaasivik saqqummersitsivillu. Qatserutaasivik aamma inissaqassaaq.

Qinngorput pillugu tapiliussaq kommunip sissaq sinerlugu aqqusineeraliornissamut kissaatigineqartutut pilersaarutaani isumannaarineruvoq, taannalu pisuttuarujoorfissaasinnaavoq, soorlu aamma sisorartunut illerngit qorsooqqinnersaqarnissarlu pilersaarummi ilaasut.

Ataatsimoortunngorlugu pilersaarummi kommunimut pilersaarummut tapiliussat 37 takuneqarsinnaapput, taamaalillunilu takuneqarsinnaalluni Nuummi inissat tamarmik qanoq eqqarsaatersorfigineqarnersut.