Kommuneqarfik Sermersuup septembari aallartittoq kommunimit pigineqartoq illoqarfimmik ineriartortitsinermi selskabi ”Siorarsiorfik – Nuuk City Development (NCD)” pilersippaa. Selskabip suliassaa tassaassaaq Nuup Siorarsiorfiullu illoqarfittut ineriartortinneqarnerinik aningaasalersuineq, ineriartortitsineq, piareersaaneq, sanaartorfissagissaaneq, sanaartorneq ingerlatsinerlu.

Illoqarfimmik ineriartortitsinermi selskabi NCD maanna pisortatigoortumik pilersinneqarpoq, siulersuisoqalerlunilu pisortaaanertaarallarpoq.

Siulersuisuni ilaasortat tassaallutik Lars Møller-Sørensen (siulittaasoq), Jess G R Berthelsen, Marie Kathrine Fleischer, Inaluk M Brandt, Karl-Gustav Jensen aamma Mike J Kristiansen.

Jens B. Frederiksen marsip aallaqqaataa 2018-ip tungaanut NCD-mi pisortaaninngorallarpoq. Aningaasaqarnermut Inuussutissarsiornermullu Ataatsimiititap tamarmiusup ataatsimiinnermini kingullermi tamanna akuersissutigaa. Jens B. Frederiksen Demokraatini siulittaasuunikuuvoq, aammalu Inatsisartuni Naalakkersuisunilu ilaasortaanikuulluni.

Jens B. Frederikseni 2014-imi politikki qimareerlugu True North Gems Greenland A/S-imi aammalu Greenland Ruby A/S-imi pisortap tulliatut atorfeqarnikuuvoq.

Jens B. Frederikseni aamma Kalaallit Nunaanni Politiini sulinikuuvoq – ilaatigut vicepolitikommissæriusimalluni.

Illoqarfimmik inerisaanermi selskabi NCD pisortaanerugallartumik atorfinitsitsivoq, uani selskabimik pilersitsinermi pisortaqarnissaq piumasaqaataammat. NCD-mi pisortaanertut atorfik marsip aallaqqaataani 2018 atorfinitsisinissaq siunertaralugu atorfik nalinginnaasumik allagarsiuunneqassaaq.

Jens B. Frederiksen sapaatip akunnerani uani sulilerpoq.