Ulluinnarni suliat pingaarnersiorneqartillugit pilersaarutit angisuut tunulliunneqannginniassammata, Nuuk illoqarfittut ineriartortinneqarnerani ulluinnarni ingerlatsinermit illikartinnissaa pingaaruteqarpoq. Taamaammat septembarip qaammataani Kommunalbestyrelse aalajangerpoq illoqarfimmik ineriartortitsinermut ingerlatseqatigiiffik pilersinneqassasoq, Siorarsiorfik – Nuuk City Development, NCD.

Minnerunngitsumik Aarhusip Umiarsualiviata ineriartortinneranit aamma Københavnip illoqarfittut ineriartortinnissaanut ingerlatseqatigiiffiup, By og Havnimit isumassarsiortoqarpoq. Ingerlatseqatigiiffiup nutaap NCD-p Nuuk illoqarfittut ineriartortinnissaanut aningaasaliinissaq, ineriartortitsinissaq, piareersaanissaq, sanaartorfissagissaanissaq, sanaartornissaq ingerlatsinissarlu aamma illoqarfiup ilaa nutaaq Siorarsiorfik isumagissavai.

Allanit misilittakkat najoqqutaralugit angusaqarusussuseqartumik ingerlatseqatigiiffeqarnikkut illoqarfiup ineriartortinnissaa pisariaqartumik malinnaaffigineqassaaq, pissutigalugu ingerlatseqatigiiffiup taanna kisiat aallutarisussaammagu.

– Matumani siunertarineqarpoq, NCD atuutsillugu illoqarfimmik ineriartortitsinissamik suliaqarnermi tamakkuninnga suliaqartunit allanik pingaarnerutitaqaratik suliarissagaat qulakkiissagatsigu, taama oqarpoq kommunaldirektøri NCD-milu siulittaasunngorlaaq, Lars Møller-Sørensen.

Nassuiaavortaaq NCD-mik pilersitsinikkut politikerit aalajangerneri piviusunngortinnissaannut sulineq nukittorsarneqassasoq aamma Nuuk illoqarfittut ineriartortinnissaa avammut takutissallugu asuliinnaanngitsumik suliaqartoqartoq.

Immikkoortortaq anginngitsoq ilisimasalli immikkut ittut angisuut

Suleqatigiit pikkorissut pilersaarummillu itisilerlugu immikkut ilisimasalinnik paasinnilluartunillu katersuutsitsinissaq pingaaruteqarpoq, pissutigalugu illoqarfimmik ineriartortitsinermut pilersaarut imaannaanngitsuummat suliassallu assigiinngitsorpassuit kalluarneqarlutik.

Nunanit allanit misilittakkat malillugit illoqarfimmik ineriartortitsineq ingerlatseqatigiiffimmut suliakkiutigineqarnerani pitsaaqutit tassaasut, suleqatigiinnik toqqaanissaq periarfissaasoq taakkulu tamakkiisumik aallussilluarnissaat qulakkeerneqassalluni.

– Taamatut aaqqissuussaasumik sulisoqartilluta immikkut ilisimasalinnik nukittuunik iliuuseqarluarsinnaasunillu pilersitsisinnaanerput qularutiginngilarput, oqarpoq Lars Møller-Sørensen.

Ingerlatseqatigiiffittaamut suliassaq aalajangiilluinnartussaq tassaavoq aningaasaliinissaq inississallugu, tamatumunngalu tunngatillugu siulittaasunngorlaaq isumaqarpoq tamanna ersarissunik pitsaaqutitaqarluinnartoq.

– NCD-qartillugu immikkoortortaq pilersaarummik tamakkiisumik ilisimasaqartoq pilersinneqassasoq qulakkiissavarput. Aningaaserivinnik aningaasaliisartunillu oqaloqateqarnitsinni inissisimatilluarpaatigut, pilersaarutillu annertusarnissaanut tutsuiginartuutilluta, taama oqarpoq Lars Møller-Sørensen.

Oqarportaaq Siorarsiorfik – Nuuk City Development nukittorsarniarlugu, NCD-mut attuumassuteqartunik inissiaqarnermut immikkoortortanik sisamanik ilanngussisoqartoq. Taamaattoqarnerani ingerlatseqatigiiffiup patajaatsumik nammineq aningaasaateqarneranik nassataqarpoq taamaalillunilu ingerlatseqatigiiffik suleqatigissallugu pilerinartuulluni.

– Taamatut alloriarnermi una paasitinniarneqarpoq, pilersaarut patajaatsutut pilerinartutullu tamakkiisumik piumassuseqarfigigipput aningaasaliisunut takutikkusullutigu, NCD-mi siulittaasoq Lars Møller-Sørensen oqarpoq.