Inuussutissarsiornermut pitsaasunik atugassaqartitsinissaq aalajangiisuulluinnarpoq aamma nunaminertallu nutaat inuussutissarsiornermut atugassat pisariaqartinneqarmata nukinginnarluinnarsilluni.

Kommuneqarfik Sermersuup pingaartippaa, namminersortut nammineq suliniuteqarnissaat aamma inuussutissarsiutillit amerlasuut pitsaasumik atugassaqartinneqarnissaat nukittorsassallugit.

– Taamaammat nuannaarutigeqaarput, uani kommunimut pilersaarummi inuussutissarsiuteqaarfiit nutaat amerlammata, aamma Nuuk inuussutissarsiuteqarfittut qanoq orniginarsarneqarsinnaanera eqqarsaatigineqarsimammat, taama oqarpoq Sanarfinermut Avatangiisinullu Ataatsimiititami siulittaasoq Malene Lynge (IA).

Immikkoortut nutaat kommunip imarpikkoortaatinut umiasualivimmiit Pukuffiup tungaanut tassanngaaniillu golfertarfiup mittarfiullu tungaanut inuussutissarsiuteqarfinngortitaani annerusumik inissisimapput. Taakku saniatigut Siorarsiorfimmi mikinerumaanik pingasunik inuussutissarsiorfinnik peqassaaq.

Pisariaqartinneqartut assigiinngitsut ilanngullugit eqqarsaatigineqareerput

Inuussutissarsiuteqarfiit taakku assigiinngitsut inuussutissarsiutinut assigiinngitsunut atugassatut pilersaarusiortoqarpoq, assersuutigalugu inuussutissarsiutinut oqimaatsuleriffiusunut umiarsualiviup eqqaani inissaqartitsisoqassaaq, taavalu kulturimut tunngasut nutaat niuernermullu tunngasunut ataatsimoorfiusussaq, CCC, allaffeqarfinnik soorlu ataatsimoortumik allaffiit allaffeqarfiillu anginerusut inissaqartissallugit.

Iluamik oqaatigalugu siunertaalluni, Qeqertani umiarsualivik inuussutissarsiuteqarfik nutaaq Pukuffimmilu inuussutissarsiorfioreersut atassusernissaat. Kommunip uani pilersaarutigaa, inuussutissarsiorfiit oqimaatsuleriffiusut assartuinermut, pilersitsiortorfinnut assassornermillu suliaqarfinnut kiisalu tunisassiorfinnut tunngasut qanittuaniissasut. Aammali oqinnerusunik suliaqarfiit inissaqartinneqassapput, soorlu allaffissornermik suliaqarfiit, kiffartuussiviit suliffeqarfiillu namminersortut.

Tamanna aamma Siorarsiorfimmi inuussutissarsiuteqarfinni nutaani pilersinneqartussani atuutissaaq. Taakku sanaartornerup ingerlanerani tunisassiorfinnut, kiffartuussivinnut assigisaanullu atorneqarsinnaapput, siunertaallunili kingusinnerusukkut inuussutissarsiutinut allanut nalinginnaanerusunut sumiiffik atorneqalissasoq.

Ataatsimoorfissami nutaami allaffiit orniginartut

Inuussutissarsiutit allat kulturikkut niuernikkullu ataatsimoorfiusup nutaap CCC-p eqqaani inissisimanissaq orniginarnerutinneqassaaq, tassa umiarsualiviup nutaap mittarfiullu ungasinngisaani aamma kusanartumik illuliaq sanileralugu ornigassaqqissullu tungaanut isikkivigissaartumi.

CCC Siorarsiorfiup illoqarfiullu immikkoortuata pisoqartaata akornanni Nuup qeqqani inissisimassaaq. Susoqarfittut angallannermilu katersuuffiulissaaq, minnerunngitsumillu inissisimaffiup tamassuma pitsaaqutai eqqarsaatigalugit takornariaqarnermut, aatsitassarsiornermut siunnersuinermullu tunngasunut suliffeqarfinnut orniginartuussalluni.

– pissutsinik pisariinnerulersitsinissaq kissaatigaarput, inuussutissarsiuteqarfiit pisariaqartitsinertik naapertorlugu kiisalu avatangiisinik orniginartuutitsinissaq eqqarsaatigalugu illoqarfimmi aaqqissuussaanerusumik inissisimasinnaaqqullugit, Malene Lynge oqarpoq.