Nuummi illoqarfiup nutaartai eqeersimaarfiussapput, peqqinnartut aammalu inunnut assigiinngitsorpassuarnik tunuliaqartunut inissaqartitsiffiussallutik. Taamaammat Kommunimut pilersaarummi nutaami pingaaruteqarpoq, illoqarfiup annertuumik inerisarneqarniarnerani inissianik nutaanik periarfissaqartitsisoqarnissaa, aammalu nalinginnaasumik inissianik, ilinniartunut inissianik inunnullu innarluutilinnut inissianik amerlasuunik sanaartorfiunissaa.

Eqqarsaatigineqartoq tassaavoq, kikkut tamarmik inissaqartinneqarnissaat, immitsinnullu soqutigeqatigiinnissarput.

– Taamaattumik pilersaarut una nuannaarutigisorujussuuara, tassanimi inuuneq tamatiguussuserlu qitiutinneqarput. Nuuk tassaajuassaaq najugaq immitsinnut eqqarsaatigeqatigiiffigisartagassarput, oqarpoq borgmesteri Asii Chemnitz Narup.

Noorarfiunerujussuaq annertuumik pisariaqartitsilersitsivoq

Ukiuni qulikkaani kingullerni Nuummi nutaarpassuarnik inissialiortitertoqareerpoq, sulili amerliartorpugut, aammalu inissialiorfissanik nutaanik noqqaasoqartuaannarpoq. Kommunimut pilersaarummi nutaami inissiat amerlerujussuarnissaat siunnersuutigineqarpoq.

Allilerineq ima ingerlanneqassaaq, illoqarfiup pioreersup eqiteriffigineratigut Qinnguttalu allilerneratigut, minnerunngitsumillu illoqarfiup nutaartassaata Siorarsiorfiup pilersinneratigut.

Ataatsimut oqaatigalugu kommunip tamakkiisumik pilersaarutigaa, inissiat nutaat 4.200-t sanaartorneqassasut, taakkunannga 800-t Nuummi Qinngutsinnilu, taavalu 3.400-t Siorarsiorfimmi.

Maannakkut siunissarput ilusilersorparput

Nuup taamarsuaq allilerneratigut siunissami Nuummut suut pingaaruteqarnersut aalajangissallugu pingaaruteqarluinnarpoq. Tamatumani kommunalbestyrelsip minnerunngitsumik pingaartippaa, tassaassasoq innuttaasut imminnut susassareqatigiiffigisaat, aammalu eqeersimaartuunissamut pitsaasunik periarfissaqarfiunissaa.

Tamakku isumannaarniarlugit, silami periarfissat inissatuulli pingaaruteqartigipput. Inissialiarineqartut seqinermut, anorimullu sammivii aammalu isikkivii eqqarsaatigineqarnissaat pingaartinneqartorujussuuvoq. Inissiat akornanni sukisaarsaartarfinnik pilersitsisoqassaaq, tamaani najugallit pinnguartarfinni naapissinnaallutik imaluunniit sissaq sinerlugu pisuttuarsinnaallutik.

– Nuuk tassaassaaq kikkunnut tamanut inissaqartitsiffiusoq, kikkullu tamarmik nuannersumik najugaqarfigisinnaasaat. Taamaattumik pilersaarut nuannaarutigisorujussuuara, nutaamik ataatsimoorfissaqarnissamut tunngaviliisuummat, ulluinnarni eqeersimaartuunissamut periarfissanik silatinnguatsinni pitsaanerulersitsissammat, borgmesteri Asii Chemnitz Narup oqarpoq.

Kikkut tamarmik isikkivilimmiissapput

Illoqarfiup alliartortinneqarnerani soorunami aamma inissiat kisivimmik pingaaruteqarput. Matumani inissiat assigiinngitsut pineqarput, tamarmik ataatsimoorussallit, tassalu pitsaassuseqassasut, pingaarnertullu iusissaattut najoqqutassiaq aallaavigalugu suliarineqassapput.

Inissiat nutaat inissinneqassapput imminnut isikkiveerutitinnaveersaarlugit, pisariaqanngitsumik imminnut alanngersimassanngillat. Siorarsiorfimmi illut allaat ima inissinneqassapput, tamarmik immap tungaanut isikkiveqartinneqassallutik.

Peqatigitillugu inissiarpassualiussaagut, pisariaqartitat piumasaqaatillu assigiinngitsut tamaasa eqqarsaatigalugit. Tassa kikkunnit tamanit najugarineqarsinnaasunik inissialiortoqassaaq.

– Nuummi kikkut tamarmik inissaqartinneqassapput, imaappoq naammattunik inissiaateqassaagut, aammalu inissiat assigiinngitsorpassuarnit pisariaqartinneqartut eqqarsaatigineqassapput, borgmesteri oqarpoq.

Eqqumiitsuliat kinaassuseqalersitsisarput

Peqatigitillugu kommunimi qinikkat kissaatigaat, illoqarfiup nutaartaani eqqumiitsulianik kinaassuseqalersitsisussanik inissiisoqarnissaa.

Matumani eqqarsaatigineqarpoq, sumiiffiit ilaanni eqqumiitsuliat eqqaassutissiaasarmata, ilaanni pinngortitamut sukisaarsaartarfimmullu ilassuuttuullutik. Tamavimmik sumiiffinnik immikkuullarissitsilersarput, kinaassusiannillu sakkortunerulersitsisarlutik.

– Uannut pingaaruteqartorujussuuvoq, illoqarfiup nutaartaasa namminneq kinaassuseqartinnissaat, eqeersimaarfiusut, Nuullu sinnera assigalugu namminneq immikkuullarissuseqartut uummaarissuseqartullu, Asii Chemnitz Narup oqarpoq.