Aqquserngit sangujoraartut, nuna atuarlugu ingerlasut. Illut nunamut pinnersumut tulluussakkat, sineriallu sanaartorfiunngitsoq, taamaalilluni innuttaasut tamarmik nuannaarutissaannik aqquteqalerniassammat. Siunissami Nuuk Issittumi illoqarfiit pingaarnersaattut isigineqalissaaq, illoqarfiit pingaarnersaat, uummaarissoq tamatigoortorlu, sulilu ineriartorfiusoq.

Kommunimut pilersaarummi nutaami illoqarfiup allilernissaa allaaserineqarpoq, nuummiunngortussat inissaqarniassammata, taavalu innuttaasut suliffeqarfiutillillu noqqaassutigisaat pilersillugit. Alliartortitsinissaq pilersaarusiorneqassaaq illoqarfiup qajannaatsuunissaa, piujuartitsiffiullunilu nungusaataaffiunani qorsortarasaarnissaalu eqqarsaatigalugu.

Ilusissaatut najoqqutassaq tamakkiisunngortitsinissamut qulakkeerutaassaaq

Illuliortaatsimi takussutissat aqukkumallugit Kommuneqarfik Sermersooq ilusissaatut najoqqutassaliorpoq, Nuup illoqarfiata ineriartortinneqarnissaanut kommunip kissaataa naapertorlugu pitsaassutsimik atorluarneqarsinnaaneranillu qulakkeerinnittussanngorlugu.

Najoqqutassaq tamakkiilluni pingaarnertut pilersaarummik tamakkiisumik isiginnilersitsisinnaassaaq taamatullu siunnerfittut tikkuussilluni soorlu immikkoortunut ataasiakkaanut inerniliussassanik siunnersuuteqarsinnaalluni. Taamaattumik najoqqutassaq inaarutaasuunngilaq, sakkussaavorli kommunip illoqarfiup ineriartortinneqarneranik aqutsillaqqissiartornera ilutigalugu ataavartumik inerisarneqartussaq.

– Najoqqutassaq atorlugu aqqutissiuussissaagut najoqqutassaliillutalu, tamatumani qulakkeerniarlugu, Nuuk assigiiaarnerusumik takussutissaqartilerumallugu, illuliortaaseq pitsaassuserlu tamanit najoqqutassanut naapertuuttunngortillugu. Taamaattorli pilersitatta iluini amerlasuutigut periarfissaqartitsivugut, borgmesteri Asii Chemnitz Narup oqarpoq.

Patajaatsumik nungusaataanngitsumillu ineriartorneq

Nuummut tunngatillugu pilersaarut nutaaq patajaatsuuvoq imaalilluni, ukiuni aggersuni allanngorujussuartoqarsinnaaneranik sillimmartaarfiussalluni, minnerunngitsumik mittarfissaq nutaaq eqqarsaatigalugu aammali takornariaqarnikkut aatsitassarsiornerullu iluini ineriartortitsisinnaanerit inuussutissarsiutit annertusisinnaanerat nussortullu eqqarsaatigalugit.

Aamma taamaalilluni pilersaarutip qulakkiissavaa, siunissami Nuuk ima ineriartortissagipput, illoqarfiup immikkuullarissumik pitsaaqutaanik siuarsaassasugut, aammalu avatangiisinut aningaasanullu tunngassutillit naapertuulluartumik eqqarsaatigalugit.

– Imaappoq, siullerpaamik illoqarfiup immikkoortuinik pilerinartunik pilersitsissaagut, aammali illoqarfik pioreersoq eqimasunngortillugu, issittumi illoqarfittut illuliortaatsillu eqqarsaatigalugit maligassiuisunngortissinnaallugu, borgmesteri Asii Chemnitz Narup oqarpoq.

Qorsortaqarfiunissaa aalajangiusimallugu

Pilersaarummi annertuumi pingaarnertut sammineqarpoq Nuuk qorsortarasaarfeqarnissaa aalajangiusimaneqassasoq. Qorsortaqarfiit sukisaarsartarfiillu illoqarfimmi illoqannginnersanik pilerinarsaaqataassapput, taamaalillunilu Nuuk illoqarfittut nuannersutut inuuffigiuminarsaaqataaffigissallugu.

Assersuutissaavoq kommunimut pilersaarummi tunngaviummat, nuna ersarissitinneqassasoq sineriak isumannaarlugu qaqqarlu tikikkuminartunngortillugu. Illoqarfiup nutaartaani tamanna takusinnaavarput, sineriak sanaartorfiunaveersaartillugu, tamanit tikikkuminartuunissaa aammalu sissaq sinerlugu ataannartumik aqquteqalernissaa qulakkeerniarlugu.

Tamatuma saniatigut sanaartukkani tamani, atuarfinni inissianilu qorsortarasaarnissaa eqqarsaatigineqarpoq. Eqqarsaatigineqarpoq minnerunngitsumik qaqqat pissusissamisoortumik sivingarngisa atorluarneqarnissaat, sukisaarsartarfiliortoqarnissaa qorsortarasaartunillu pilersitsisoqarnissaa, sumiiffiup pissusaa atuarlugu nunataanik ersarissunngortitsisumik pinngortitamullu qaninnerulersitsisumik.

Najukkami avatangiisit ataatsimoorfiusut

Siorarsiorfimmi inissiat aamma pinngortitamik ataqqinnittumik inissinneqassapput, taamaalillutik portussutsit, qaqqani aniinganerit kuuillu naleqalersitsissapput. Tamarmik immamut isikkiveqassapput, illullu akornini ataatsimoorussiffiusinnaasunik pilersitsiffiusinnaaneri eqqarsaatigalugit inissinneqassallutik. Siorarsiorfimmi illoqarfiup immikkoortortaata qeqqa, umiarsualiviup eqqaani illoqannginnersamiippoq tassannga Nuup illoqarfia takuneqarsinnaalluni.

– Illoqarfiup immikkoortuanik nutaamik pilersitserusuppugut, ataatsimoorneq pitsaassuserlu qitiutillugit. Sumiiffik uummaarissoq, inuit imminnut susassareqatigiiffigisaat, aammalu silami periarfissanik pilerinartunik pilersitsiffiunissaanik eqqarsaateqarfiusoq, Asii Chemnitz Narup oqarpoq.