Siorarsiorfimmiit Kangerluarsunnguup tungaanut aqqusineq maanna titartarneqarpoq, illoqarfiullu inerisarneqarneranut atatillugu pilersaarummut ilaatinneqassalluni. Eqqarsaatigineqartoq tassaavoq, aqqusineq sammisassanut assigiinngitsunut periarfissaqartitsilissammat soorlu sisorarneq, hiisterneq mountainbikernerlu, aammalu nutaamik illoqarfimmik inerisaanissamut periarfissaqalissalluni.

Ataatsimut isigalugu Kangerluarsunnguaq najorumaneqartorujussuusarpoq, soorlu uilunniarfigalugu, aalisarfigalugu, aqisserniarfigalugu imaluunniit nunami aliannaarsaarluni pisuttuarfigissallugu. Taamaattumik Kangerluarsunnguup tungaanut aqquteqalerpat Nuuk suli najugariuminarnerulissaaq tikeraarumaneqarnerulissallunilu.

Kapisilinnut ATVinut aqqut

Kangerluarsunnguup tungaanut aqquteqalernikkut kangerluk asilu ammaassiffigineqassapput, angallammillu atuinngikkaluarluni tikikkuminarnerujussuanngussalluni. Peqatigitillugu nunaqarfik Kapisillit kangerlullu Sermilik (Isfjorden) aamma ataqatigiissilerneqarsinnaapput.

Kapisillit tungaannut aqqut pinngortitamit aallartissaaq, inuit aqqutinnaavi atuarlugit, kingornatigullu ATVnut aqqutinngortinneqassalluni, taannalu aamma mountainbikertarfittut hiisterlunilu aqqutigineqartartunngortinneqassaaq. Ukiukkut aqqut tamanna snescootererfigineqartassaaq sisoraatinullu arpaffigineqartalissalluni.

– Taamatut attaveqaateqalernikkut Nuup-Kangerlua sammisassanut amerlaqisunut ammaassiffigineqassaaq, uatsinnut maani najugaqartunut pilerinartut, aammali Nuuk takornariaqarfissuartut inerisarneqarnissaanut periarfissarpassuarnik pilersitsiffiusussaallutik, oqarpoq borgmesteri Asii Chemnitz Narup.

Ujaqqanik piiaasoqaannassaaq

Pilersaarutigineqarpoq, ujaqqerivimmit nikisittakkamit ujaqqat illoqarfimmi sanaartortoqarnissaanut atugassat tunniussuunneqassasut, peqatigitillugulu ujaqqerivik Ukkusissat tunuat sinerlugu aqqusinniassamik qaartiterissalluni. Taamaasilluni aqqusinissamut aqqut, Nuup tungaanut atassuteqaataalersussaq pilersinneqassaaq Kangerluarsunnguami periarfissarpassuaqartitsilersussaq.

Kangerluarsunnguaq periarfissarpassuarnik ulikkaarpoq, aqqusineqalerpallu Nuummi anersaartorfissat ilagilissavaat. Aalisarneq, qaqqasiorneq, piniarneq, mountainbikerneq aammalumi ukioq kaajallallugu sermersuarmi sisorarneq periarfissaalissapput. Uilortartoqarsinnaarvoq, nunianneq allaallumi Kingittorsuaq qaqiniarneqarsinnaalluni.

– Nuuk immamik qaqqanillu avatangerneqarluni alianaatsumi inissisimavoq, taamaattumilluangallateqanngikkaanni illoqarfiup avataanukarnissaq ajornakusuulaartarluni. Tamakkununnga aqqusineq iluaqutaassaaq, taamaasillunilu kikkut tamarmik asimukarsinnaalissapput, angallateqarunik angallateqanngikkunilluunniit, borgmesteri Asii Chemnitz Narup oqarpoq.

Sumiiffiit nutaat ammaassiffigineqassapput

Kangerlummi aqqusineqalerpat aamma illoqarfiup annertuseqqinneqarnissaanut periarfissaqalissaaq, tamanna pisariaqartinneqassappat. Kangerluarsunnguaq kangerluk sinerlugu umiatsialiveqarnermut tunngasunut nutaanik nunaminertaqalissaaq aammalu inissiaqarfinnik alianaatsumi inississimasunik pilersitsiffiussalluni.

Borgmesterip erseqqissarpaa, eqqarsaatigilluaqqissaarneqartariaqartoq, illoqarfik qanoq annertusarneqassanersoq, pisariaqanngitsumillu pinngortitaq innarlernagu. Peqatigitillugu nikeriarneq pitsaasuuvoq, tassami Nuuk pinngortitap pissusaata akimmiffissarititaanut taamarsuaq akornutissaarummat.

– Tamakkuupput illoqarfiup nungusaataanngitsumik inerisarneqarnissaanut periarfissatsialanngortut, sulilu Nuuk najugaqarfigiuminartunngortinneqarluni, borgmesteri oqarpoq.