Tamatumani pineqarput Sanarfinermut Avatangiisinullu Ingerlatsivimmi direktøriusimasoq Mike Kristiansen, maanna NCD-mi Teknisk Direktøritut atorfeqalertussaq. Aapparaalu kommuneteknikeriunertut atorfeqarsimasoq Christian Dyrbjerg Andersen, maanna NCD-mi teknikkimut immikkoortortaqarfimmi pisortanngortussaq.

Atorfinitsinneqartut tamarmik suliassaq nalunngilluarpaat, ukiuni kingullerni marlussunni Kommuneqarfik Sermersuumi Siorarsiorfimmi illoqarfimmillu inerisaanermi suliniutit susassaqarfigisimagamikkit.

”Christiaap Mikellu NCD-mut nuunneqarnissaat attuumassuteqartunut tamanut pissusissamisuuginnarpoq. Illoqarfimmik inerisaanermi misilittagaqartuujupput, unalu suliniut tamatta naamassiniagassarput ilusilersueqataaffigisimallugu ”, Nuuk City Developmentimi pisortaaneq, Jens B. Frederiksen oqarpoq.

Nuuk City Development suli atorfinnik ataasiakkaanik inuttaliinissaminik amingaateqarpoq. Atorfiit taakkua qaammatini aggersuni inuttassarsiuunneqarumaarput.