Pilersaarutip aningaasalerneqarnissaa maanna iluatsereernikuuvoq, tassa Nunatsinni Namminersorlutik Oqartussat 2018-imut Aningaasanut Inatsisikkut meeqqat atuarfiinut tunngasut kommuninut tunniunneqarmat.

Tamanna isumaqarluni, atuarfinnik sanaartornermut taakkulu aserfallatsaaliorneqarnerannut atugassanik Nunatsinni kommunit ataatsimoortumik tapiissutit aqqutigalugit aningaasaliivigineqartassasut. Kommuneqarfik Sermersooq ukiumut 32 millioner koruuninik pissarsisinneqarpoq, taakkulu aningaasat atorlugit kommune pilersaarummut kingornagullu attartornermut aningaasartuutinik siumoortumik akiliuteqarnissaanut naammapput, tassa kommunip aningaasaqarnerata sinneranut sunniuteqaataasussaanngitsumik.

Atuarfiliornermut ilanngullugu sunngiffimmi ornittakkamik (AKO) aamma meeqqerivimmik sanasoqassaaq, taakkulu atuarfittuulli Nuup illoqarfiata qeqqani Blok P-ip toqqaviginikuusaani sanaartorneqassapput.

”Taakku ataatsimoortillugit OPS-mik pilersaarutitut neqeroorutigitinneqassapput. Tamanna isumaqarluni, pilersaarummik piviusunngortitsinissamut NCD pisariaqartutigut aningaasaliissutissaqartoq, taavalu neqeroortitsinermi suliffeqarfiit ajugaasuusut meeqqerivimmik atuarfiliornermillu sanaartorlutillu ukiuni tulliuttuni 20-ni 30-niluunniit aserfallatsaaliinermik ingerlatsinermillu suliaqassallutik. Taamaalilluni uagut aamma Kommuneqarfik Sermersuup piffissami tassani aningaasartuutaasussat nalunngereerpavut,” NDC-mi pisortaaneq Jens B Frederiksen taama oqarpoq.

NCD 1. oktobari 2017 pilersinneqarmalli neqeroortitsinermut tunngasut arlalissuit sukumiisumik piareersarneqarput, tassungalu peqatigitillugu ukiuni aggersuni suliassanut sulisussarsiorneq ingerlanneqarluni.

Atuarfiliornerup meeqqeriviliornerullu saniatigut sissaq atuarlugu aqqusineeraliornissami immikkoortup siullianut Nuup Saavaniit Saqqarliit tungaanut tunngasumik neqeroortitsinissaq NCD-mit piareersarneqassaaq. Soorlu aamma sanaartorfissagissaanerit allat arlallit aallartisarneqaleruttortut.

Taakku saniatigut inissialiortiternerit aallartinneqassapput.

”Kommuneqarfik Sermersuumi Kommunalbestyrelsip aalajangigaat piviusunngortinneqarnissaannut tunngasunik aalajangiinissatsinnut sulisussat pisariaqartut atorfinitsinneqareerput,” Jens B Fredriksen oqarpoq. ”Siunissami qaninnerusumi suliassat arlaqartut neqeroortitsissutigisinnaaleratsigit nuannaarutigaara. 2018-imi ukiup affaata siulliata ingerlanerani NCD-ip suliassanut tunngasut neqeroortitsissutigisinnaanngussagai naatsorsuutigaarput.”

Annertunerusumik paasisaqarnerorusukkaanni attavissaq Jens B Frederiksen uunga sianerluni +299 49 95 95