Nuup illoqarfiata ilassaa nutaaq Siorarsiorfik Kangerluarsunnguamut appakaaffissap tungaanut pinngortitarsuarmi kusanartumi inissisimassaaq. Kisianni tamaanga qaarsut sivingasuut aqqusaarlugit tikikkuminaatsukkoortussaavoq, taamaattumillu aqqusinniorniaraanni salliarnartamik qaartitsisoqartariaqassalluni imaluunniit Siorarsiorfiup tungaanut pitsaasumik aqqutiliorniaraanni Ukkusissaq aqqusaarlugu sullorsualiortoqartariaqassalluni.

Siorarsiorfimmik-pilersaarut sullorsualiornissamik aammalu salliarnartamik qaartiterinissamik imaqarpoq. Aaqqiissutissat marluk taakku iluaqutissartaqarput, ungasinnerusorlu eqqarsaatigalugu imaassinnaavoq marluutillugit piviusunngortinneqartut. Kisianni salliarnartamik qaartiterisoqarneratigut aqqusinniornissaq angujuminarnerussagunarpoq. Salliarnartaq aqqusaarlugu Nuup sinneranut aqquteqalissaaq sissaq sinerlugu aqqut kusanartoq ammasoq atuarlugu, taassumalu Nuup Issittumi illoqarfiit pingaarnersaattut nuannersutut tusaamaneqarnera sakkortunerulersissavaa.

– Siorarsiorfiup tungaanut Siorarsiorfimmiillu tamaanaqqulluni nuannersorujussuussaaq, aqqutillu taassuma Nuuk Issittumi illoqarfiit pingaarnersaattut nutaaliaasutut tusaamaneqalersitseqataaffigissavaa, Sanarfinermut Avatangiisinullu Ataatsimiititami siulittaasoq, Malene Lynge oqarpoq.

Nuuk ataatsimoorfiusoq

Sissaq atuarlugu aqquteqarnikkut pinngortitaq misigineqarsinnaassaaq, biilerluni, cykkilerluni pisuinnarluniluunniit. Kusanartumik appakaaffissaalissaaq, angallannikkut aammalu sukisaarsaarneq eqqarsaatigalugu sineriak ammaassiffigineqartussaalluni.

Piffissami tamatumani sissaq sinerlugu aqqutikkut Nuuk toqqaannartumik attavilerneqassaaq, akerlianilli sullorsualiortoqassappat Siorarsiorfik illoqarfeeqqatut immikkoortutut misinnarsissaaq, Nuup ilaatut ikkunnaarluni.

– Neriuppugut sissaq atuarlugu aqqut pilerinartunngussasoq, illoqarfimmut atassuteqaataallunilu illoqarfiup ineriartortinneqarnissaanut suliatsinnut atatillugu illoqarfimmut nutaamik ilisarnaatinngussasoq, Malene Lynge oqarpoq.

Aqquserngup aqquteeqqallu akuleriissinnissaat akikinnerussaaq

  Kommunip pilersaarutaanut ilaatinneqareerpoq Qinngutta Siorarsiorfiullu attaveqaqatigiissinnissaannut sissaq atuarlugu aqqusiortoqassasoq. Taamaattumik sissaq atuarlugu salliarnartamik qaartiterinikkut aqqusinniorneq aamma sissaq sinerlugu aamma aqquteeqqamik ilaneqarpat aaqqiissutissaq ataatsimut akikinnerulersinneqassaaq.

Salliarnartamik qaartitsinikkut qaqqaq sinerlugu aqqusiortoqassaaq, tamatumani isaariaq qaarajuttoq kangerluup tungaanut appakaaffiussalluni, taavalu qaqqaq betonimik akuiakkamik qalligaq aqqusineq kaajallassallugu.

Biilertut pisuinnaat cykkilertullu isumannaatsumik ingerlasarnissaat qulakkeerniarlugu aqqusineq taanna pilersaarutit naapertorlugit pisuinnarnut cykkilertunullu aqqutiliarineqassaaq. Taamaalilluni salliarnartakkut ammaanneqassaaq, innuttaasut sumiiffimmik tamassuminnga sammisassaqarfittut atuinissaannut, aammalu Nuummi eqeersimaarnerusumik inuuneqartitsilernissamut pitsaanerusunik periarfissiissalluni.

Sissaq sinerlugu aqqusineq isumannaarneqartariaqarpoq

Siullermik sullorsualiornissap soqutigineqaraluarneranut pissutaavoq, patajaatsumik isumannaatsumillu aqquteqartinneqarnissaa. Kisianni maannamut misissuinerit takutippaat, sissaq sinerlugu aqqusinermut ajornartorsiutaanavianngitsoq, qaqqat sisoortoornissat pinaveersaartinniarlugu pisariaqartinneqartumik isumannaarneqarnerisigut.

– Anguniarparput kusanartumik, patajaatsumik isumannaatsumillu attaveqaataasumik aqquteqartitsinissaq, taannaassammat illoqarfiup nutaartassaanut pissanganartumut nutaamut attaveqaataasussaq, Malene Lynge oqarpoq.