Ulluinnarni suliat pingaarnersiorneqartillugit pilersaarutit angisuut tunulliunneqannginniassammata, Nuuk illoqarfittut ineriartortinneqarnerani ulluinnarni ingerlatsinermit illikartinnissaa pingaaruteqarpoq. Taamaammat illoqarfimmik ineriartortitsineq selskabimut Siorarsiorfik – Nuuk City Development, NCD-mut suliakkiunneqarpoq.

Ingerlatseqatigiiffiup nutaap NCD-p Nuuk illoqarfittut ineriartortinnissaanut aningaasaliinissaq, ineriartortitsinissaq, piareersaanissaq, sanaartorfissagissaanissaq, sanaartornissaq ingerlatsinissarlu aamma illoqarfiup ilaa nutaaq Siorarsiorfik isumagissavai. Allanit misilittakkat najoqqutaralugit angusaqarusussuseqartumik ingerlatseqatigiiffeqarnikkut illoqarfiup ineriartortinnissaa pisariaqartumik malinnaaffigineqassaaq.

Sulisut immikkut ilisimasallit taassuminngaannaq suliaqassapput.

Tassani illoqarfimmik ineriartortitsinermik pilersaarut imaannaanngitsuummat suliassanullu assigiinngitsunut attuumassuteqarmat, suleqatigiinnik pikkorissunik pilersaarummik ilisimannilluartunik immikkullu ilisimasalinnik ataatsimoortitsinissaq pingaartuuvoq.

Taamaammat suleqatigiittussanik toqqaanissaq pitsaaqutaassaaq, qulakkeerlugulu tunniusimalluarlutik aallussilluarsinnaanerat. Taamaaliornikkut suleqatigiinnik immikkut ilisimasalinnik pilersaarummillu ilisimannilluartunik ataatsimoortitsisoqarsinnaavoq.