Nuup illoqarfiata qeqqa suli uummaarinnerulissaaq, tamaani illoqarfiup qeqqa illoqarfiullu qiterpasissua inerisarneqassalluni nutaamik atuarfiliorfigalugu meeqqeriveqarfiliorfigalugulu. Nuummili illoqarfiup aaqqissuunneqarnerani innuttaasunut 30.000-inut inissaqartitsisoqarsinnaanngorlugu sumiiffinnut nutaanut siammarlugu ineriartortitsisoqarnissaa pilersaarutaavoq.

Taamalilluni illoqarfiup qorsooqqinnersai pigiinnarneqarsinnaassapput, ineriartortitsinerlu siammarnerullugu aamma illoqarfimmi angallannermi illoqarfiup qeqqani biilerpassuaqannginnissaa eqqarsaatigalugu.

Illoqarfiup qeqqa nunap ilusaa allanngortitaanngitsoq uummaarissoqarfiusorlu

Illoqarfimmi qitiusoqarfittaassat tassaassapput atuarfiit, meeqqeriviit, kulturimut tunngassutillit inuussutissarsiuteqarfiillu. Illoqarfiup qeqqi nunap ilusaa allanngortinnagu inissinniarneqarput. Taamatut sumiiffiit nammineq ilisarnaateqarlutillu uumassuseqalersitseqataassapput.

Siorarsiorfimmi qitiusoqarfik nutaarluinnaq pilersinneqassaaq, maannakkullu Nuummi qitiusoqarfiit pioreersut, Nuussuaq aamma Qinngorput paaqqinniffinik kulturikkullu neqeroorutinik suliffissanik nutaanik pilersitsiffiullutik annertusaaffigineqassapput. Taamaalillutillu illoqarfiup immikkoortortaanni sumiiffiit qitiusoqarfii uummaarissuutinneqarlutillu inuiaqatigiinni eqeersimaartuunissamik angorusutaq aallunneqassaaq, najugaqartut najugaqarfigiinnarnagu inuuffigissammassuk.