Siorarsiorfiup pinngortitamut qanittuunissaa eqeersimaartumillu inooriaaseqarnissamut periarfissaqarnissaq Nuummit aallutarineqarput. Immikkoortut qorsooqqissut sukisaarsaarfiusullu illoqarfimmi sumiiffinnik pilerinarsaaqataassapput aamma misigisassanut timersornissamullu periarfissaqartitsilluarlutik.

Taamatut eqqarsartaaseqarnermi nunap ilusaa allanngortinnagu ersersinniarnissaanut apuuffigiuminartuunissaanullu tunngaveqarpoq. Illoqarfiup immikkoortuini nutaani tamanna takusinnaavarput, ilaatigut sissap sinai sanaartorfiunatik, taamaalillutik inuit pisuttuarsinnaallutik sissarlu ataatsimoorunneqartutut misigitinneqarluni.

Periarfissarpassuit nutaat

Illoqarfiup ilaa nutaaq, Siorarsiorfik, Nuup illoqarfianik allileeqataasussaammat, immikkoortut nutaat ammaanneqassapput, taamaattoqarneratigut pinngortitami eqeersimaartuunissamik arlalitsigut periarfissiivoq:

Kangerluarsunnguup tungaanut aqquteqalernikkut pisuttuarnissamut, hiisternissamut qaqqakkullu sikkilernissamut periarfissanik ammaassissaaq. Majuartaat gondollift atorlugu inuit Ukkusissamukarsinnaapput, namminnerlu qaavanut pisullutik qaqisinnaallutik. Aammalu Qinngorput Siorarsiorfiullu akornanni sissaq sinerlugu aqqusineeraliortoqassaaq, tamaanilu najugaqartut sissaq sinerlugu pisuttuarsinnaallutik imaluunniit arpattarsinnaallutik.